​Ég heyri í þér 
Þú ert í næsta herbergi 
Hrjótandi - umlandi
Þú sefur vært
 
Ætli þér sé kalt?
 
Ég bíð aðeins með að standa upp 
til að breiða yfir þig sængina
Sem er dottin á gólfið
 
Ætla fyrst að klára drykkinn minn og 
hugsa um fortíðina sem aldrei varð
Fortíðina sem ég hef búið til 
í huga mínum. Þar sem 
ég er hetjan sem bjargar deginum 
Ekki þessi vesæli maður 
sem ég sé í speglinum 
 
Fingurnir mínir 
eru dofnir af kulda
Glugginn er opinn og 
vindurinn á greiða leið inn
 
Ég fer inn til þín eftir smá stund, 
get allt eins klárað úr flöskunni
 
Ætli þér sé kalt?
 
Ég finn hvernig augnlokin verða þyngri
 
Flaskan tóm
 
Finn ekki fyrir tánum núna
 
Ætli þér sé kalt?