- Fékkstu pakkann frá mér?
- Nei, ég ætlaði..æi..skiptir ekki máli
- Kom hann ekki til þín?
- Jú ég gleymdi bara að sækja hann, gætirðu sent hann aftur?
- Svosem, er reyndar búinn að reyna að senda þér þessa hluti nokkrum sinnum áður, viltu ekki fá þá?
- Jújú ég gleymi bara alltaf að sækja pakkann, þú veist hvernig það er..
- Hvað meinarðu?
- Æi, bara lífið
- Er lífið að stoppa þig í því að sækja pakkana?
- Já, eða nei, æi það er svo flókið eitthvað, en ég lofa að ég sæki hann næst
- Lofarðu?
- Já ég lofa
- Allt í lagi, þetta verður í síðasta skipti sem ég sendi þér þessa hluti - þú baðst um þá til að byrja með
- Ég veit, ég gleymi bara alltaf að fara niður á pósthús, þú veist hvernig ég er
- Nei, ég veit það eiginlega ekki, finnst ég ekki þekkja þig lengur
- Þekktirðu mig nokkurn tímann?
- Ef til vill ekki
(ÞÖGN)
- Viltu að ég bæti einhverju í pakkann?
- Nei, hann er fínn eins og hann er
- Ertu viss um að þú þurfir þessa hluti?
- Já alveg 100% viss
- Ónýtan snúrusíma frá ömmu?
- Já, hann er mikilvægastur
- Hvað ætlarðu að gera við hann?
- Horfa á hann
- Ha?
- Horfa á hann á náttborðinu mínu, kannski hringir hann
- Þú veist að hann er bilaður
- Maður veit aldrei
- Er eitthvað sem þú vilt segja mér?
- …nei..ég held ekki
- Ertu einmana?
- Alltaf
- ….já….ég skil
- En þú?
- Oftast
- Ekki alltaf?
- Ekki alveg
- Hvenær ertu ekki einmana?
- Þegar ég sef, og þegar ég veit ekki af sjálfum mér
- Viltu sofa núna?
- Alltaf
- Að eilífu?
- Að eilífu
- Komdu þá….
(ÞÖGN)